VIAXE a Brasil en Xuño do 1989

(Primeira PARTE)     

Fixemos unha viaxe a Brasil, os tres membros da familia, cunha duración de preto dun mes a finais de xuño do ano 1989. A primeiros de xullo do ano 2002 fixemos a nosa segunda viaxe ó mesmo país.

Nesta segunda viaxe vimos o mesmo que na primeira e algo máis, pero noutra compañía.

Repetimos tódolos sitios, non sendo que na primeira fomos á cidade de Maceió, no nordeste brasileiro, e na segunda viaxe non o fixemos, pero fomos a máis lugares que da primeira vez.

Brasil é un país excepcional onde poderiamos perfectamente vivir si non foran os moitos motivos que nos atan á nosa terra.

Nas dúas viaxes a cousa comezou igual: collemos o taxi que nos mandou a compañía aérea dende Portugal para trasladarnos ó aeroporto Francisco Sá Carneiro de Oporto. Daquela a terminal de saídas e chegadas era pouco máis ca un pequeno galpón.

A primeira vez fomos os tres nun avión  McDonnell Douglas DC 10-30 da compañía brasileira Varig cunha capacidade para algo máis de 230 pasaxeiros.

A segunda vez que fomos tamén veu buscarnos un taxista, que nos levou ó aeroporto de Oporto, pero nesta ocasión tan só iamos a muller e eu e a terminal do aeroporto xa era outra cousa.

O avión que nos levou nesta ocasión era un Airbús da compañía Tap portuguesa.

As dúas veces, despois de facer escala en Lisboa e en Río de Xaneiro, sobre as seis ou sete da tarde chegamos ó aeropuerto internacional de Guarulhos en Sao Paulo, onde nos estaba esperando a familia.