CARAUTAS (CARETAS)
Asoma o seu rostro sanguinario
de fascismo vello
disfrazado como antano
de salvador de patrias inventadas
erguendo fronteiras impostoras
abandeiradas da desigualdade
das que falan
das que rezan
das que visten
outras linguas
outros rezos
outros traxes
das que agochan o seu medo
nun disfraz de valentía
das que choran inxustizas
das que levan na cor da pel
o seu calvario.
Persoas seladas coa culpa do alleo
condenadas á exclusión
e ao esquecemento.
Asoma o seu rostro implacable
de xugo opresor
disfrazado como antano
na finxida defensa dun pobo en perigo.
Verdugo inclemente
executor
dos distintos
dos distantes
dos que foxen da penuria
da miseria e da fame.
Asoma o seu rostro sen conciencia
de ambición do absoluto
afincado como antano
nos que apreixan os cumios do poder
coas gadoupas da infamia e a vilanía
de intereses mesquiños que engolen a xustiza
e manteñen un mundo
de opresores e oprimidos
de vítimas e verdugos
vencedores e vencidos.
máis artigos
♥♥♥ síguenos ♥♥♥