Nun luns calquera, un plan improvisado lévame a atopar un escrito, un corazón magoado desafoga a súa saudade. Un fillo escribe ao seu pai falecido unha carta e arrebólaa do máis alto da montaña situada na beira do mar. Ese luns calquera, a casualidade ou o caprichoso destino puxo nas miñas mans esta historia, escríboa baseada nesa carta.
Ola papá:
Sempre me dicías que as augas deste belo lugar da costa atlántica eran máxicas, porque cambian de cor segundo o momento do día, eu quedaba horas e horas, cando era neno, embobado véndoas. Asustábame a idea de volver a velas e non miralas coa mesma ilusión que cando tiña dez anos, que non esteas para explicarme para que serve cada unha das cousas que construíu o home, ou repetirme que nin o mellor enxeñeiro de camiños conseguiu aínda, romper a regra de que “Todo o que se quita ao mar, este recupérao por outro lado”.
Volvo aquí despois de tanto tempo, volvo para purgar as miñas culpas.
A brisa mariña acaríñame agarimosamente os cabelos, finxo ser un neno por breves instantes que non teme a nada porque estás ao meu lado. Percibo todas as sensacións de paz e acougo que se fan palpables neste máxico paraxe, síntote aquí onde compartimos tantos momentos que por un tempo se volveron dolorosos , síntote en min.
Vén á miña memoria o recordo dun feito que me impactou profundamente, unha persoa espallou dende o alto desta montaña as cinzas da súa irmá. Este sitio é sagrado sóubeno desde entón.
Quero recuperar a ilusión perdida o día que ti te fuches para sempre, o día que se silenciou o teu alento, e eu despedinte cun bico e unha promesa. Fronte a este mar que amabas pídoche perdón, papá, por incumprir esa promesa.
A crueldade da enfermidade arrincoute deste mundo sen darme tempo de asimilalo, vivir o día a día contigo e ver como o cancro facía estragos en ti foi algo moi duro para todos, a min encheume dunha furia e unha ira contida. A miña ledicia foise contigo e, vivir convertérase en algo indiferente para min. Unha parte importante de min morreu contigo e esquecín vivir por un tempo.
Todas as túas ensinanzas, o teu exemplo como o meu guía, o teu apoio nos meus proxectos, todo o ignorei afogado na miña mágoa, sentíndome unha vítima . O meu amor propio esfumouse como se evapora a auga a cen graos de calor, no meu caso de furia. Todo o que saía de min era dor e odio cara ao mundo, o vitimismo era agora o meu compás.
Afasteime de todo o que me lembraba a ti para non sentir a túa ausencia, convertinme nunha persoa mediocre e gris, falto de sentimentos válidos para dar a quen máis me quería.
Ela deixoume un día, dous meses despois da túa morte, cansada de aguantar as miñas culpas cara a todo ao meu arredor, incapaz de vivir ao meu lado unha vida de sufrimento carente de esperanzas, de degoiros. Vivir a través dela facíame distanciarme da realidade e non notaba a túa ausencia. Ao non notar a fatiga de ter que remar nas turbulentas augas da vida non notaba que ti non estabas. Ti aprendíchesme a navegar, déchesme as suficientes ferramentas a través dos teus valores para saber guiarme polo mar de noite, polas estrelas. Estiven cego, deixara o leme da miña vida nas mans doutros.
Ela deixoume, e nese momento fun consciente do só que estaba, só co meu quebrado espírito.
Miro ao horizonte e respiro unha calma envolvente, a miña mente e o meu espírito comezan a curar. Aprendín a lección de como xestionar a miña dor, apoiándome nos meus seres queridos e dándolles apoio porque eles tamén te perderon.
Non te preocupes papá, volvín a ordenar de novo a miña vida e comecei a cumprir a promesa que che fixen, quería que te sentiras orgulloso de min. Estráñote tanto que pensar en ti alíviame a alma, sinto unha inmensa soidade ao lembrarte.
Hoxe remato esta carta que escribín oitenta e dous días despois da túa morte, e léocha aquí na cima desta montaña fronte a este mar testemuña das nosas vivencias compartidas, por sempre lembradas.
Quérote moito papá, botareite tanto de menos que non notarei a túa ausencia.
Até sempre, eternamente no meu pensamento.
O protagonista desta historia é un mozo valente con inquedanzas, o seu sorriso chegoume ao corazón. Tiven o pracer de compartir con el unha agradable conversa fronte a un descafeinado. A carta volveu ás súas mans, grazas a que asinou cunha inicial e un apelido e nas redes sociais atopeina.
Manel Monteagudo
Escritor
Nacín en Cando, concello de Outes aínda que cando só tiña dous anos trasladeime coa miña familia ó lugar de Corral de Orro, pertencente ao concello de Noia. Ao saír da escola, con 14 anos, enroleime como engraxador nun buque pesqueiro-conxelador que facía a campaña de pesca en Sudáfrica, na captura da pescada. Despois nun buque mercante español, pero como o salario non cubría as miñas perspectivas (14.000 pesetas), marchei para Hamburgo; após de estar hospedado durante catro días no Stella Maris, conseguín enrolarme, tamén de engraxador, nun buque mercante alemán cun moi bo salario que permitiu que a economía no eido familiar mellorase. Entón comecei a estudar electricidade e electrónica naval por correspondencia. Despois de rematar o servizo militar marchei de novo para Alemaña e reincorporeime á mesma navieira que estivera. Enroláronme como oficial electricista nun mercante novo que saíra dos estaleiros no tempo que eu estivera facendo a mili. Salientar que tiven a prestixiosa honra de ser o oficial máis novo de toda a mariña mercante alemá (tiña 21 anos). Neste buque estiven tan só cinco meses e medio dado que o 28 de febreiro do ano 1979 (ese día cumpría 22 anos) tiven un accidente gravísimo ao caer dende seis metros de altura á adega do barco. A causa das secuelas que me deixou o accidente, estiven practicamente vexetal durante 35 anos, pero o 15 de outubro de 2014 déronme a alta médica, no entanto teño que tomar medicación o resto da miña vida.
No ano 2015 escribín un pequeno poemario que titulei Reflexións Poéticas, auto-editado. Na actualidade, ademais de escribir relatos, que publico semanalmente nas redes sociais, escribo poemas e prosa poética e no 2019 saíu do prelo o meu segundo poemario Camiño á Lagoa dos Bardos.
máis artigos
Actividades culturais do 15 ao 21 de abril 2024 por Ana Santos
by Ana | Abril 14, 2024 | Actividades | 0 Comments
Actividades do 8 ao 14 de Abril 2024 por Ana Santos
by Ana | Abril 7, 2024 | Actividades | 0 Comments
Actividades culturais do 1 ao 7 de abril 2024 por Ana Santos
by Ana | Marzo 31, 2024 | Actividades | 0 Comments
Actividades culturais do 18 ao 24 de marzo 2024
by Ana | Marzo 17, 2024 | Actividades | 0 Comments
Actividades culturais do 11 ao 17 de marzo 2024 por Ana Santos
by Ana | Marzo 9, 2024 | Actividades | 0 Comments
Actividades culturais do 4 ao 10 de marzo 2024 por Ana Santos
by Ana | Marzo 3, 2024 | Actividades | 0 Comments
Víctor Pedreira Crespo por Ana Santos Solla
by Ana | Abril 14, 2024 | Historias de vida | 0 Comments
Carmen Fernández Conde por Ana Santos
by Ana | Marzo 10, 2024 | Historias de vida | 0 Comments
Fidelina Gómez Rancaño por Ana Santos
by Ana | Febreiro 11, 2024 | Historias de vida | 0 Comments
Fita a Galana por Ana Santos Solla #devellabella#
by Ana | Xaneiro 14, 2024 | Historias de vida | 0 Comments
Coco Pimentel Piernas por Ana Santos Solla
by Ana | Decembro 17, 2023 | Historias de vida | 0 Comments
Rosabel Piñeiro Boullosa por Ana Santos Solla
by Ana | Novembro 12, 2023 | Historias de vida | 0 Comments
Víctor Pedreira Crespo por Ana Santos Solla
by Ana | Abril 14, 2024 | Historias de vida | 0 Comments
Mirando al mar por Marina Filgueira
by Colaborador | Abril 14, 2024 | Literarias | 0 Comments
El agua en Galicia por Luis Guereñu
by Colaborador | Abril 7, 2024 | Articulos | 0 Comments
Viaxe a Brasil 1ª parte por Manolo Gulias Márquez
by Colaborador | Abril 7, 2024 | Escapadas | 0 Comments