O QUE NOS CONTA MONTSE:
“Muller con Cabra” Óleo sobre táboa 30×23,05 cm
É a reprodución do orixinal de Marc Chagall. Grande autor ao que sempre voltamos e imprescindible para coñecer o Surrealismo do século XX. Fantasías e soños están presentes nos seus traballos. O carácter onírico queda subliñado nesta composición.
No cadro vemos unha figura masculina fóra da escena da cabra e a muller que aparecen unidas. Diferentes animais aparecen nas súas pinturas. Entre eles, a cabra en numerosas ocasións. As cores brillantes son características de Chagall, destacando especialmente a azul que aquí envolve a parte central da obra. A luminosidade que aporta o amarelo é patente.
Notas biográficas da autora:
Montse naceu na Estrada en 1960. Estudou no Instituto Manuel García Barros desta cidade o bacharelato e Filoloxía Hispánica en Compostela, exercendo como profesora de Lingua galega e literatura durante 25 anos.
Desde 1988 vive na Coruña a onde chegou tras obter destino definitivo en Carballo, aínda que pouco despois conseguiu o traslado para o IES Ramón Menéndez Pidal da cidade, alí desenvolveu a docencia ata a súa xubilación no 2007.
Ao xubilarse puido dedicarse de forma máis plena a unha das súas paixóns: pintar. Na súa produción artística conta con cadros orixinais seus e outros, coma este que nos presenta hoxe, que son interpretacións de autores aos que admira.
máis artigos
♥♥♥ síguenos ♥♥♥