O QUE NOS CONTA MONTSE:
“O gato dos peixes vermellos”. Óleo sobre lenzo 40×30’5cm.
É a reprodución do orixinal de Henri Matisse datado en 1910.
Como creador do “Fauvismo” destaca polo uso que fai das cores para expresar os seus sentimentos. As súas figuras planas están pechadas por liñas que as perfilan.
Así vemos deste xeito un interior con ventá aberta á natureza, é este un motivo moi do seu gusto; un gato tentando coller uns peixes, el adoraba os animais e en especial os gatos; unha mesa vista desde arriba, que aparece tamén no lenzo “Interior vermello: natureza morta sobre mesa azul”; un fondo zigzagueante que nos lembra o movemento que se está a producir.
A harmonía entre as figuras animais, os obxectos, o espazo interior e exterior é clara.
Notas biográficas da autora:
Montse naceu na Estrada en 1960. Estudou no Instituto Manuel García Barros desta cidade o bacharelato e Filoloxía Hispánica en Compostela, exercendo como profesora de Lingua galega e literatura durante 25 anos.
Desde 1988 vive na Coruña a onde chegou tras obter destino definitivo en Carballo, aínda que pouco despois conseguiu o traslado para o IES Ramón Menéndez Pidal da cidade, alí desenvolveu a docencia ata a súa xubilación no 2007.
Ao xubilarse puido dedicarse de forma máis plena a unha das súas paixóns: pintar. Na súa produción artística conta con cadros orixinais seus e outros, coma este que nos presenta hoxe, que son interpretacións de autores aos que admira.
máis artigos
♥♥♥ síguenos ♥♥♥