(Relato pertencente a Tres viaxes no tempo de Ramón Caride)
Entrou naquela tenda de cedés, nun barrio periférico que non coñecía apenas. Un letreiro escrito a man, anunciando a vindeira liquidación por cese de actividade, campaba na vidreira. Levaba tempo sen ver negocio ningún de venda de música en soporte físico. Anos se cadra. Esta debía ser a última tenda de cedés que quedaba no país antes coñecido como Galicia e/ou Galiza, e agora como comunidade autónoma descafeinada do noroeste. Con probar non se perdía nada, decidiu. Entrou.
Daquela, o corazón deulle un chouto. Acababa de chegar, mirou por riba, e foi un deses instantes máxicos dos que acontecen poucos na vida. Velaí estaba. A piques estivera de pasar sen o ver, case desapercibido entre a fileira de cubertas de monstros ironmaideanos, bachatas e triunfitos. Finalmente, era seu. E iso que entrara á tenda sen esperanza ningunha. A decadencia das tendas de cedés parecía correr parella á do mundo en xeral. As pouquísimas que restaban convertéranse en tendas de camisetas. Así e todo, nunca deixaba de entrar en ningunha e probar. Sen sorte, até hoxe mesmo.
Levaba tanto tempo pescudando aquel disco que lle daba pena admitilo. Coma o pobre xogador da canción de Los Suaves, debía apostar todo á carta derradeira para así non ter nada máis que perder, para poder rematar sen nada. Rematar sen nada. A única forma digna do fracaso. Porque buscar un cedé vinte e sete anos é absurdo, pero non máis absurdo do que é a vida en xeral. E aquí o tiña, ao cabo. Velaquí a peza cobrada ante os seus ollos de asombro, abertos e presos no seu feitizo. No sitio onde menos agardara achalo, cando xa non o esperaba. Mirouno engaiolado. Ao comezo, mesmo lle parecía que o soñaba. Pero non, era certo. Alí estaba. Era o disco que lle faltaba, o mesmo que procurara tantos anos de tenda en tenda, e máis tarde nas páxinas especializadas en coleccionismo da rede. O mesmo disco que tivera tanto éxito nos seus xa afastados anos de estudante compostelán. Daquela triunfara na súa primixenia e clandestina versión de vinilo negro en funda de cartón, envoltorio que rematara rachado e coa tinta erosionada por tantas mans que o compartiran, tanto como o propio disco finara de seu, cuberto de pegadas dixitais e raias nos sucos pola repetición innúmera dos xestos e das escoitas. Acaso como a súa alma gastada e marcada a ferro polas pegadas e mudanzas dos tempos e vontades que mudaran, segundo anunciara o cantor, aínda que non a mellor necesariamente.
A certa altura da vida, pensou, dá vertixe mirar cara atrás. O peor é que case dá vertixe ollar a calquera lado. A vida está chea de malentendidos: el sempre confundira os bugallos coas landras, por exemplo. Ou sexa, a superestrutura coa infraestrutura, que vén sendo como comezar a casa polo tellado. Por iso preferira de sempre a Soledad Bravo antes que a Mercedes Sosa. Velaí a razón de procurar gravacións de cantos revolucionarios e non as edicións raras das obras fundacionais de Karl Marx ou Rosa Luxemburg. O universo é infinito, certamente. Pero os límites do coñecemento humano directo son case tan estreitos coma os do coñecemento carnal, que xa é dicir.
Volveu soñar un gran incendio que alumease o mundo co seu resplandecer, unha biblioteca de Alexandría en lapas elevada á enésima potencia, e que liberase de vez o espírito humano, sulagándoo nun océano de paz e ledicia perpetuas, dunha amplitude cósmica. Tan cumprido e tan brillante coma o lume ardente que as hordas proletarias comandadas por Lenin, Trosky ou Bakunin ergueran no seu día. Pero desta volta cun final máis feliz do que lle tocou a Allende: Eso no está muerto/ no me lo mataron/ ni con la distancia/ ni con el vil soldado. Impensadamente escoitábao na súa cabeza, cunha intensidade descoñecida en case tres décadas.
Alén do dito, Chile volvía estar de moda hoxe, agora pola súa gastronomía. Nin a nostalxia é o que era… Aínda coa quentura que despedía o remol do incendiado Palacio de Inverno ardéndolle nas fazulas, pagou o cedé. Quince euros con oitenta e cinco. Meteu o recibo na carteira e rexeitou a bolsa de plástico. Non vía a hora de chegar á casa e poñelo.
Saíu da tenda e o seu paso pareceulle, non sabía ben polo que, o andar dun rapaz máis novo.
Ramón Caride Ogando
Profesor de Bioloxía, escritor
Ramón Caride Ogando naceu en Cea, Galicia, en 1957. Estudou Bioloxía na Universidade de Santiago de Compostela e traballou como profesor de secundaria. É un prolífico escritor que cultivou diversos xéneros como a poesía, a narrativa para nenos e adultos e o ensaio. Escribe en galego, e a súa primeira obra narrativa publicouse en 1990, “Os ollos da noite. Algunhas das súas obras traducíronse ao castelán como Perigo vertical, O futuro roubado, Ameaza na Antártida ou O frío azul. Pola súa produción de literatura infantil e xuvenil, o autor galego foi recoñecido co Premio Merlín. Tamén se fixo con premios como “Risco ou Café Dublín”, polas súas novelas. É un dos fundadores da revista A Santa Compaña de Cambados(segunda época) e colaborou como columnista en El Mundo, Faro de Vigo ou O Correo Galego.
“No 2017 xubilouse do ensino formal, da escrita por agora aínda non”
máis artigos
Actividades culturais do 22 ao 28 de abril 2024 por Ana Santos
by Ana | Abril 21, 2024 | Actividades | 0 Comments
Actividades culturais do 15 ao 21 de abril 2024 por Ana Santos
by Ana | Abril 14, 2024 | Actividades | 0 Comments
Actividades do 8 ao 14 de Abril 2024 por Ana Santos
by Ana | Abril 7, 2024 | Actividades | 0 Comments
Actividades culturais do 1 ao 7 de abril 2024 por Ana Santos
by Ana | Marzo 31, 2024 | Actividades | 0 Comments
Actividades culturais do 18 ao 24 de marzo 2024
by Ana | Marzo 17, 2024 | Actividades | 0 Comments
Actividades culturais do 11 ao 17 de marzo 2024 por Ana Santos
by Ana | Marzo 9, 2024 | Actividades | 0 Comments
Víctor Pedreira Crespo por Ana Santos Solla
by Ana | Abril 14, 2024 | Historias de vida | 0 Comments
Carmen Fernández Conde por Ana Santos
by Ana | Marzo 10, 2024 | Historias de vida | 0 Comments
Fidelina Gómez Rancaño por Ana Santos
by Ana | Febreiro 11, 2024 | Historias de vida | 0 Comments
Fita a Galana por Ana Santos Solla #devellabella#
by Ana | Xaneiro 14, 2024 | Historias de vida | 0 Comments
Coco Pimentel Piernas por Ana Santos Solla
by Ana | Decembro 17, 2023 | Historias de vida | 0 Comments
Rosabel Piñeiro Boullosa por Ana Santos Solla
by Ana | Novembro 12, 2023 | Historias de vida | 0 Comments
Alleo á moda por Jose Solla Casqueiro
by Colaborador | Abril 21, 2024 | Fotográficas | 0 Comments
O Vello Cárcere de Lugo e a memoria por Anxo Gonález Guerra
by Colaborador | Abril 21, 2024 | Articulos | 0 Comments
Viaxe a Brasil 2ª parte por Manolo Gulias Márquez
by Colaborador | Abril 21, 2024 | Escapadas | 0 Comments
PONTEVEDRA,RUEIRO RE-DETALLADO por Peque González
by Peque | Abril 16, 2024 | Etnografía | 0 Comments