Comezou a historia da arte un día moi, moi distante, na semiescuridade dunha cova. O primeiro artista, alguén abrumado polo caos circundante e polas ameazas mortais, procurou a fondura dun abrigo na aba da montaña, e alí decidiu representar o mundo, reconstruílo ao seu xeito. Ordenouno impoñendo un método estrito nas imaxes pintadas naquel muro: as vulvas da fertilidade, as femias grávidas, os homes armados, as cazadas, os animais abaténdose submisos baixo as frechas… Traballou, tras daquela descuberta, moitas horas, cos dedos tinguidos en sangue, en óxido, en graxa. Só, abstraído, ensumido nas súas lembranzas e soños. E longo tempo despois do solpor, á luz insegura dos fachos, lume recén domeado daquela, admirou a súa obra, á fin satisfeito. A parede cuberta polos pigmentos, feitos agora signos, sinais dun universo restaurado.
Absorto aínda na contemplación da obra primixenia, o primeiro artista non foi quen de erguer a vista e reparar na serpe que, silandeira, se ía achegando aos seus pés ata o mesmo instante de sentir a picadura. Lamentablemente había, xa daquela, seres insensíbeis á arte.
Ramón Caride Ogando
Profesor de Bioloxía, escritor
Ramón Caride Ogando naceu en Cea, Galicia, en 1957. Estudou Bioloxía na Universidade de Santiago de Compostela e traballou como profesor de secundaria. É un prolífico escritor que cultivou diversos xéneros como a poesía, a narrativa para nenos e adultos e o ensaio. Escribe en galego, e a súa primeira obra narrativa publicouse en 1990, “Os ollos da noite. Algunhas das súas obras traducíronse ao castelán como Perigo vertical, O futuro roubado, Ameaza na Antártida ou O frío azul. Pola súa produción de literatura infantil e xuvenil, o autor galego foi recoñecido co Premio Merlín. Tamén se fixo con premios como “Risco ou Café Dublín”, polas súas novelas. É un dos fundadores da revista A Santa Compaña de Cambados(segunda época) e colaborou como columnista en El Mundo, Faro de Vigo ou O Correo Galego.
“No 2017 xubilouse do ensino formal, da escrita por agora aínda non”
Daquela Maneira
máis artigos
♥♥♥ síguenos ♥♥♥