O día vintesete de febreiro comezamos a nosa segunda viaxe coa organización nacional do imserso. Sempre pedimos viaxes ás illas e esta vez tocounos a viaxe de dez días a Mallorca, aínda que na realidade son oito se descontamos o día da ida e o da volta. Arrastrando un par de maletas “trolley”, das que permiten levar na cabina do avión, fomos para a estación de autobuses de Pontevedra. O noso transporte colleríanos alí ás seis e cuarto da tarde e así foi, non se retrasou, pois viña dende Vigo.
Despois de tomar lista unha empregada da organización da viaxe, emprendemos camiño pola autoestrada para chegar ó aeroporto Rosalía de Castro de Santiago de Compostela ás oito menos cuarto da tarde. O avión da compañía Enter Air sairía para o aeroporto de Son Sant Joan de Palma de Mallorca ás nove e cuarto.

O voo foi sen problema ningún e aterramos no aeroporto de Palma a iso das once da noite. Era a segunda vez que pisabamos a illa.

Alí colleunos de novo un autocar que, depois de facer varias paradas en diferentes hoteis, en algo máis de tres cuartos de hora nos levou ó hotel Samos, coa categoría de catro estrelas, na avenida Solivera nº 12 da cidade de Magalluf.