Estas viaxes, sempre formativas, quedarán reflectidas en múltiples facetas da súa creación artística, entre outras, na utilización diversa das técnicas e procedementos, buscando sempre a creatividade artística lonxe de espazos tradicionalmente artesanais , nos que aprende o oficio como unha achega máis da súa formación inicial pero que van resultar traballos que traspasan o propio concepto artesanal.

No seu regreso á actividade propiamente laboral, traballa na empresa Hermanos Atienza, S.A, onde é contratado como deseñador de vidreiras e murais cerámicos durante os anos 70 do século XX. Decide volver ao país sobre 1977 e establécese de xeito autónomo no Concello de Ourol onde comezará a carreira en solitario.

A súa traxectoria ampla como artista multidisciplinar lévao a realizar múltiples exposicións plásticas en diferentes certames en Madrid, Barcelona, Pontevedra, Viveiro, Ribadeo,…. Conxuga estas exposicións con traballos vítreos para centros relixiosos e laicos por diferentes puntos de Galicia, Avilés, Xixón,….

Escultura, forxa, mural plástico e cerámico , constitúen esa pluralidade creativa de Neira Brochs.

No mural cerámico os seus proxectos adquiren proporcións considerables, como o da lonxa de Viveiro ou os das igrexas de Narón Espiñaredo, a residencia Betania en Viveiro, ou os das fábricas de Cervexa Polar de Caracas, e Estrella Galicia. Coruña, Madrid, As Pontes, Burela… son localidades onde os murais do artista viveirense repártense entre a obra civil, relixiosa e particular, estando o inventario deste traballo por facer.

A última exposición antolóxica no Museo Provincial de Lugo de 2014 é unha mostra que descobre moitas desta facetas do artista do Landro, e deixa aberta unha exhaustiva investigación sobre o seu inmenso legado patrimonial. Tres cadros, no Centro de Arte Reina Sofía de Madrid , son proba suficiente da dimensión da obra de Neira Brochs, que segue desenvolvendo a súa faceta creadora e educativa tanto na Mariña como fóra dela.

José Luis Neira Brochs nace en Viveiro en 1941. Realiza estudos na Escola de Artes e Oficios de Madrid, e posteriormente no Círculo de Bellas da mesma cidade. Viaxa a París perseguindo unha aprendizaxe de corte máis vangardista coincidindo coa efervescencia cultural do Maio do 68 e matriculándose na École de Beaux -Arts da mesma cidade. Viaxa por Alemaña , na que reside temporalmente en dúas ocasións , por Suíza e Luxemburgo, buscando a efervescencia creativa dunha Europa xa desligada da fonda ferida da Segunda Guerra Mundial.

Colaborador